ජාත්‍යන්තර පරිසරය කෙසේ වෙනස් වුවද චීනය බාහිර ලෝකයට පුළුල් ලෙස දොරටු විවර කරන බව චීන අගමැති Li Qiang මහතා පවසයි.
හත්වන චීන ජාත්‍යන්තර ආනයන ප්‍රදර්ශනයට සහභාගී වන ගැනුම්කරුවන් ඇතුළු සෙසු නියෝජිතයන් සමඟ ඊයේ (4) පැවති රැස්වීමකදී ඔහු මේ බව ප්‍රකාශ කළා.
මෙම අවස්ථාවට එක්ව සිටි විදෙස් ව්‍යවසායකයන් චීන වෙළඳපොළ පිළිබඳව සුභවාදී අදහස් පළ කළ අතර, ඔවුන් තම චීනය තුළ ආයෝජන වැඩි වැඩි කිරීමට සූදානම් බවයි දැනුම් දී ඇත්තේ.
චීන අගමැතිවරයා ද මෙහිදී පැවසුවේ චීනය අඛණ්ඩව වෙළඳපල ප්‍රවේශය ලිහිල් කරන අතර විදුලි සංදේශ, අධ්‍යාපනය, සංස්කෘතිය සහ වෛද්‍ය ප්‍රතිකාර වැනි අංශවල විවෘත කිරීම් ක්‍රමානුකූලව පුළුල් කරන බවයි.
ව්‍යාපාරික පරිසරය අඛණ්ඩව වැඩිදියුණු කිරීමටත්, අනෙකුත් ක්ෂේත්‍ර අතර නිෂ්පාදන සාධක, සුදුසුකම් බලපත්‍ර ලබා දීම සහ රජයේ ප්‍රසම්පාදන සඳහා සහභාගී වීමට සමාන අවස්ථා ලබා දෙන බවටත් ඔහු මෙහිදී සහතික වී තිබෙනවා.
චීනය විදේශ ව්‍යවසායන් සඳහා අපනයන ගමනාන්තයක් පමණක් නොව ආයෝජන සහ ව්‍යවසායකත්වයේ දේශයක් බවට පත් වනු ඇතැයි ද Li Qiang මහතා මෙහිදී විශ්වාසය පළ කළ බවයි චීන මාධ්‍ය පවසන්නේ.
චීන සහ විදේශීය ව්‍යවසායකයින් ආර්ථික ගෝලීයකරණයට ස්ථිර ලෙස සහයෝගය දක්වමින්, ලෝක ආර්ථිකය සඳහා නව වර්ධනීය අවස්ථා පෝෂණය කිරීමට එක්ව කටයුතු කරනු ඇතැයි ඔහු බලාපොරොත්තු පළ කළේය.
