චීන කොමියුනිස්ට් පක්ෂ මධ්‍යම කාරක සභාවේ මහලේකම්, ජනාධිපති, මධ්‍යම හමුදා කොමිසමේ සභාපති ෂී ජින් පිං මහතා අද (23) පස්වරුවේ ෂින්ජ්‍යං ප්‍රදේශයේ විවිධ ජනවාර්ගික කණ්ඩායම්වල සහ විවිධ ක්ෂේත්‍රවල නියෝජිතයින් හමුවිය. පක්ෂ මධ්‍යම කාරක සභාව වෙනුවෙන් ඔහු ෂින්ජ්‍යං හි සියලුම ජනවාර්ගික කණ්ඩායම්වල ජනතාවට අවංක සහ හෘදයාංගම සුබ පැතුම් පිරිනමා ඇත. චීන මාදිලියේ නවීකරණ ක්‍රියාවලිය තුළ වඩාත් සුන්දර ෂින්ජ්‍යං ප්‍රදේශයක් ගොඩනැගීමට සමස්ත ජනතාව එක්සත් වී ඉදිරියට යනු ඇතැයි ඔහු එහිදී අපේක්ෂා පළ කළේය.
ෂී ජින් පිං මහතා, ෂින්ජ්‍යං උයිගුර් ස්වායත්තයේ, අදාළ අංශවල, කෝරළ සහ නගරවල නිලධාරීන් සහ විශ්‍රාමික නිලධාරීන් මෙන්ම, ‘ෂින්ජ්‍යං නිෂ්පාදන හා ඉදිකිරීම් බලකායේ’ නායකත්ව කණ්ඩායමේ සාමාජිකයින්, ෂින්ජ්‍යංහි සංවර්ධනයට සහාය සඳහා යවන ලද සෙසු ප්‍රදේශවල කාර්ය මණ්ඩල නියෝජිතයින්, අධිකරණ, පොලිස් අංශවල නියෝජිතයින්, ආගමික ප්‍රජාවේ දේශප්‍රේමී පුද්ගලයින් සහ බිම් මට්ටමේ ආගමික කාර්ය මණ්ඩල නියෝජිතයින් ද හමු වී සුහද පිළිසඳරක නිරත විය.
අනතුරුව ජනාධිපතිවරයා Urumqi අගනගරයේ ස්ථානගත කර ඇති භට පිරිස්වල කර්නල් සහ ඊට ඉහළ නිලයන් දරන ප්‍රමුඛ පෙළේ සාමාජිකයින් මෙන්ම, බිම් මට්ටමේ ආදර්ශවත් පුද්ගලයින් සහ සිවිල් නිලධාරීන් හමුවූ අතර, පක්ෂ මධ්‍යම කමිටුව සහ මධ්‍යම හමුදා කොමිසම වෙනුවෙන් ඔවුන්ට අවංක සුබ පැතුම් එක් කළේය.
