යුක්රේන අර්බුදයට දේශපාලන විසඳුමක් ලබා දීම සඳහා වන අඛණ්ඩ උත්සාහයන් වෙත යොමු වීමේ අවශ්‍යතාව චීනය අවධාරණය කරයි.
එක්සත් ජාතීන්ගේ ආරක්ෂක මණ්ඩලය වෙත අදහස් දක්වමින් එහි චීනයේ නිත්‍ය නියෝජ්‍ය නියෝජිත ගංග් ෂුවාං මහතා මේ බව පැවසීය.
දෙරට අතර යුද ගැටුම් සම්බන්ධයෙන් රුසියාව සහ යුක්රේනය මෑතකදී එක් වූ සාකච්ඡාවන්හිදී ඇති කරගත් එකඟතාවන් ක්‍රියාත්මක කිරීම අඛණ්ඩව සිදු කළ බව හෙතෙම මෙහිදී පෙන්වා දෙනු ලැබීය.
යුද සිරකරුවන් සහ මියගිය සොල්දාදුවන්ගේ දේහයන් හුවමාරු කර ගැනීම සහ අනෙකුත් මානුෂීය ගැටළු සඳහා විසඳුම් ලබා දීමේ කටයුතු අඛණ්ඩව පවත්වාගෙන යාම පිළිබඳව එහිදී නව එකඟතාවකට පැමිණි බවත් ගංග් ෂුවාං මහතා පැවසීය.
චීනය මෙම ධනාත්මක වර්ධනයන් සාදරයෙන් පිළිගන්නා බව අවධාරණය කළ ඔහු ආරක්ෂක මණ්ඩලයේ දී අදාළ පාර්ශ්වයන්ගෙන් ඉල්ලා සිටියේ, කල් පවත්නා සහ ස්ථාවර සාම ගිවිසුමකට එළඹීමේ අරමුණින් සම්මුතියකට පැමිණීම සඳහා අන්‍යෝන්‍ය විශ්වාසය වැඩි දියුණු කිරීමට පියවර ගන්නා ලෙසයි.
කෙසේවෙතත් ගෙවුණු දින කිහිපය තුළ රුසියාව සහ යුක්රේනය එකිනෙකාට එරෙහිව මහා පරිමාණයෙන් දියත් කළ ඩ්‍රෝන සහ මිසයිල ප්‍රහාරයන් හි ප්‍රතිඵලයක් ලෙස ජීවිත හානි රැසක් අහිමි වීමත් විශාල දේපළ හානියක් වාර්තා වීමත් චීනයේ දැඩි කණස්සල්ලට හේතු වී ඇති බව එක්සත් ජාතීන්ගේ චීන නිත්‍ය නියෝජ්‍ය නියෝජිතවරයා පවසා ඇත.
එබැවින් චීනය යළිත් වරක් ගැටුමට සම්බන්ධ පාර්ශ්වයන්ගෙන් ඉල්ලා සිටින්නේ උපරිම සංයමයකින් යුතුව ජාත්‍යන්තර මානුෂීය නීතියට අනුකූලව කිසිදු අයුරකින් සිවිල් වැසියන්ට සහ සිවිල් යටිතල පහසුකම් වෙත පහර දීමෙන් වළකින ලෙස ය.
එහිදී යුද පිටියේ ඇති වන ගැටුම් වහාම සමනය කිරීමට දෙපාර්ශ්වයම ඒකාබද්ධ උත්සාහයන් ගැනීම අත්‍යවශ්‍ය බැවින් දේශපාලන විසඳුමකින් අර්බුදයට වියඳුමක් ලබා ගන්නා ලෙස ඉල්ලා සිටින බව ගංග් ෂුවාං මහතා ප්‍රකාශ කර ඇත.
තවද, සාමය සඳහා වන නිසි සම්මුතියක් වෙනුවෙන් චීනය සැමවිටම ජාත්‍යන්තර ප්‍රජාව දිරිමත් කරන බවත්, මෙම අර්බුදයේ දේශපාලන විසඳුම ප්‍රවර්ධනය සඳහාත් සියලු පාර්ශ්වයන් ඒකාබද්ධව ප්‍රායෝගික උත්සාහයන් ගත යුතු බවත් ඔහු වැඩිදුරටත් පැවසීය.
එමෙන්ම යුක්රේන ගැටලුව සම්බන්ධයෙන් චීනය සැමවිටම තොරතුරු සහ තර්ක මත පදනම් වූ අපක්ෂපාතී ස්ථාවරයක් පවත්වා ගෙන යන අතර ක්‍රියාකාරීව රාජ්‍ය තාන්ත්‍රික මැදිහත්වීම් සිදු කර රුසියාව මෙන්ම යුක්රේනය සමඟ ද සන්නිවේදනය පවත්වා ගනිමින් දේශපාලන විසඳුමක් සඳහා ඵලදායී කාර්යභාරයක් ඉටු කරනු ඇතැයි එක්සත් ජාතීන්ගේ චීන නිත්‍ය නියෝජ්‍ය නියෝජිත ගංග් ෂුවාං මහතා සඳහන් කර තිබේ.
